Në seancën e sotme parlamentare deputetja Rudina Hajdari ka folur me tone të ashpra në drejtim të kryeministrit Edi Rama dhe socialistëve për hapjen e negociatave dhe integrimin e Shqipërisë në Bashkimin Europian.
Hajdari iu kundërvu dhe ish-ministrit të Financave Arben Ahmetaj dhe tha se ai u shkarkua në dhjetor dhe ky fakt nuk tregon sukses.
Hajdari u shpreh ndër të tjera se në Tiranë ka një numër të lartë të ndërtimeve të reja dhe sipas saj kjo tregon se ky është një burim i parave të pista që rrjedhin nga krimi i organizuar.
“Zoti Ahmetaj, ju u shkarkuat në dhjetor 2018. Ky fakt s’është barometër suksesi për qeverinë tuaj. Gjatë vitit 2018 ishte një tjetër vit i rrënimit ekonomik të Shqipërisë. Jemi në prag kolapsi.
Raportet për realitetin janë të nxira. Raporti i DASH tregoi shumë qartë se krimi i organizuar ka kapur ekonominë në çdo aspekt. Kjo tregon se s’jemi në një ekonomi që po rritet por në një ekonomi farsë. Tirana po shpërthen me ndërtime të reja nga pastrimi i parave. Paaftësia e Edi Ramës qëndron te paaftësia për të ndëshkuar klientelizmin. Situata i ka dalë jashtë kontrollit.
Ai është kampion për të mos pranuar ato që bën. Është kampion në këtë sport. Ai shmang përgjegjësinë që ka në dështim. Të mos harrojmë që viti 2018 u mbyll me një protestë madhore nga studentët. Familja shqiptare s’ka mundësi të rrisë fëmijët në Shqipëri. Kjo është arsyeja pse largohen.
Qeveria s’ka bërë asgjë për të rinjtë. Në vitin 2018 kaloi disa ligje preferenciale për oligarkët. Këta njerëz po fitojnë nga buxheti i shtetit. Dua të theksoj se propaganda e radhës tregon se s’jemi në gjendje të mburremi në çdo aspekt. Kemi dështuar të japim shpresë për të rinjtë, se kemi vizion për të hapur dyert e Evropës.
Mos t’ju shesim shqiptarëve fabula të dështuara. Në vitin 2019, do të jetë viti testues. Do e shihni sesi në raportet e tjera, realiteti do të jetë edhe më keq. Kemi nevojë t’ju themi realitetin. Të jemi sa më të fortë, të tregojmë çfarë do të ndodhë vërtet me negociatat.”, tha Hajdari gjatë fjalës së saj.
