Pamje të trishtueshme vazhdojnë të vijnë nga qyteti i Durrësit.
Në mes të ditës, zbulimet arkeologjike shkatërrohen pa mëshirë nga një kompani ndërtuese.
Në gropën ku po ndërtohet pallati gjendet një amforë e mureve Romake që nga periudha e lashtësisë.
Mirëpo pavarësisht kësaj, kompania vijon të dëmtojë zbulimet arkeologjike në Vilën e Zogut duke i betonizuar ato.
Ajo që e bën edhe më të dhimbshëm këtë fakt është që nga ana e qeverisë dhe Bashkisë së Durrësit nuk ka ende një reagim, institucione këto të cilat pavarësisht denoncimeve të vazhdueshme dhe publikimit të pamjeve, nuk kanë marrë asnjë masë për të frenuar këtë masakër që i bëhet trashëgimisë kulturore të qytetit.
Ashtu siç duket edhe nga video e publikuar nga protesto.al , punimet vazhdojnë edhe pse kjo pjesë e qytetit duhet të mbrohej nga shkatërrimi që po i bën kompania ndërtuese, e cila sheh interesin e saj në plan të parë, duke shkelur hapur mbi këto zbulime arkeologjike, të cilat në çdo vend tjetër të botës janë të shenjta, ndërsa në vendin tonë cilësohen si pavlerë përballë interesit të një grushti të vogël njerëzish që duan vetëm të përfitojnë me çdo kusht.
