“Rrëmbimi” i 13-vjeçares që ngriti në këmbë Tiranën, dosja shkon te Krimet e Rënda

Ditën e djeshme një “rrëmbim” i sajuar i një adoleshenteje 13-vjeçare ngriti në këmbë të gjithë Tiranën dhe Policinë e Shtetit.

Ngjarja ndodhi rreth orës 16.00 ku fillimisht u tha se një vajzë 13 vjeçare ishtë rrëmbyer nga një makinë e kuqe në momentin që kishtë dalë nga furgoni i shkollës së bashku me të motrën.

Më pas rezultoi se e gjitha ka qenë një lojë mes fëmijëve, ku adoleshentja e kishte sajuar historinë me pretendimin se familja nuk e linte të dilte me shoqërinë.

Ajo u gjet pas pak orësh teksa po konsumonte një kafe bashkë me shoqet dhe shokët në ambjentet e një qendre tregtare.

Tashmë rrëmbimi i sajuar i 13-vjeçares do të referohet në Prokurorinë e Krimeve të Rënda, ndërkohë që mësohet se ky procedim do të mbyllet pasi nuk ka asnjë vepër penale.

Zyrtarë të Policisë Kriminale thanë se ky nuk ishte një rrëmbim por një keqkuptim.

Nga burimet brenda policisë, mësohet se do të ketë një prononcim zyrtar mbi ngjarjen, por paraprakisht mësohet se vajza është gjetur në shoqërinë e dy shoqeve dhe dy shokëve të saj për të cilë paraprakisht kanë rrëfyer se e kishin inskenuar vetë ngjarjen.