Ra nga kati i 6-të dhe shpëtoi, flet për herë të parë nga spitali portieri Aldo Teqja

Ditën e shtunë e gjithë Tirana u trondit pas lajmit se futbollisti i dytë i Partizanit Aldo Teqja ishte hedhur nga kati i gjashtë i pallatit ku banonte në rrugën “Medar Shtylla” në kryeqytet.

Fillimisht u deklarua se portieri e kishte kryer këtë akt në kushte të rënda psikologjike, por prindërit e kanë përgënjeshtruar këtë lajm duke thënë se ishte aksident pasi Teqja po përpiqej të rregullonte tendën e ballkonit.

Edhe vetë Teqja ka folur nga spitali për gjendjen e tij shëndetësore.

Në një intervistë për Top Channel ai është shprehur se më e keqja ka kaluar dhe së shpejti do të rikthehet në fushë.

“Ndihem mirë…më e keqja kaloi, do të rikthehem shpejt në fushën e lojës”, thotë ndër të tjera Aldo Teqja.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Ndërkohë, prindërit e 24 vjeçarit kanë përgënjeshtruar mediat, duke thënë se Aldo nuk u hodh por ra aksidentalisht nga ballkoni. Ata shprehen se Aldo kishte dalë në ballkon për të rregulluar tendën por aty kishte ndodhur gjithçka si vijoi më pas.

“Dua të përgënjeshtroj të gjitha mediat dhe portalet, djali im ka pësuar një aksident. Gjithashtu dua të falenderoj të gjithë stafin e spitalit të traumës, Klubin Partizani dhe Federatën Shqiptare të Tutbollit për ndihmën që na kanë dhënë. Gjithashtu dua të theksoj se e fejuara e djalit së bashku me prindërit e saj kanë qenë këtu me ne që nga dita e parë dhe deri më tani. Aldo do të kthehet shumë shpejt si kampion”, u shpreh Ramazan Teqja, babai i Aldos.

Edhe mjekët japin sinjale pozitive për gjendjen shëndetësore të futbollistit të të klubit Partizani.