Shkodra tashmë është kthyer në një nga zonat më problematike për kryeministrin Edi Rama.
Bashkia më e madhe e qarkut vijon të udhëhiqet nga Voltana Ademi e Partisë Demokratike.
Pas dorëheqjes së Vladrin Pjetrit, Shkodra mbeti jo vetëm pa kryebashkiak por dhe pa koordinator të PS.
I gjendur në këto kushte, mësohet se pasditen e djeshme kryeministri Edi Rama, i cili është dhe kryetar i PS ka mbledhur koordinatorët e qarkut Shkodër, ku do të diskutohej me emrat që do të vendosen si drejtorë në këtë qark.
Pas largimit të Pjetrit, Rama kërkoi që të gjithë drejtorët në Shkodër të japing dorëheqjen, dhe kjo duket se është arsyeja e këtij konflikti brenda socialistëve.
Për gati 2 muaj, socialistët nuk bien dakord për emrat e drejtorëve të rinj.
Burime për Dosja.al bëjnë me dije se në mbledhjen e zhvilluar dje, ku morën pjesë deputetët Musa Ulqini, Arben Pëllumbi, Senida Mesi e Tom Doshi si dhe kryetaren e Këshillit Bashkiak Shkodër Brisela Kadia, e Paulin Stërkaj, ka patur debate për emrat e propozuar.
Mësohet se ka qenë Paulin Stërkaj i cili nuk ka pranuar që në Shkodër të emërohen drejtorë emrat e propozuar nga Mesi.
Në këtë situatë, kryeministri Edi Rama duket se nuk ka dashur që të jetë më prezent.
Ai është larguar dhe iu ka kërkuar të vazhdojnë vetë bisedimet.
Teksa doli nga selia rozë, ai qeshi para gazetarëve, por nuk dha shpjegime lidhur me këto diskutime.
