Fituesi i zgjedhjeve të parakohshme në Kosovë më 6 tetor, kryetari i lëvizjes “Vetëvendosje” , Albin Kurti ka publikuar ditën e sotme të gjithë letrat e urimit që ka marrë.
Ndërmjet këtyre letrave mund të dallohen urimet që Kurti ka marrë nga disa liderë në rajon, si Zoran Zaev, Gramoz Ruçi..etj.
“Gjatë dy javëve të fundit pranova shumë telefonata, mesazhe e letra urimi për rezultatin dhe suksesin e Lëvizjes VETËVENDOSJE! në zgjedhjet e 6 tetorit. Nga Kryetari i Kuvendit të Shqipërisë, z. Gramoz Ruçi, Kryeministri i Maqedonisë së Veriut, z. Zoran Zaev, Kryetari i Kryesisë së Bosnjë dhe Hercegovinës, z. Željko Komšić, Nënkryetari i Kuvendit të Malit të Zi, z. Genc Nimanbegu, ish Presidenti i Kroacisë, z. Stjepan Mesić, e shumë të tjerë. Me bashkëpunim të ngushtë me partnerët fqinjë e miq tonë, do të jemi një hap përpara zhvillimit e integrimit tonë. U jam mirënjohës të gjithëve për urimet, përgëzimet dhe gatishmërinë e shprehur për mbështetje,”-shkruan Kurti në postimin e tij.
Por në fluksin e këtyre letrave ka rënë në sy mungesa e urimit të kryeministrit Edi Rama, duke shtuar dyshimet se të dy tashmë nuk kanë një marrëdhënie të mirë me njëri-tjetrin.
Kjo krisje erdhi pasi Albin Kurti mbështeti protestën e studentëve në dhjetor në vitin e kaluar në Shqipëri, e cila nuk u prit mirë nga kryeministri Rama.
