Paralajmërimi i fortë: Së shpejti dalin emrat e zyrtarëve të lartë shqiptarë që do i ndalohet hyrja në SHBA (VIDEO)

Me anë të një video në Facebook, Ambasada e Shteteve të Bashkuara të Amerikës rikujtoi edhe njëherë faktin se deputetit Tom Doshi, ish-kryebashkiakut të Durrësit Vangjush Dako dhe ish-kryeprokurorit Adriatik Llalla, u është ndaluar përgjithmonë hyrja në Amerikë.

Jo vetëm atyre por gjithashtu edhe familjarëve.

Por nuk mjafton me kaq, pasi ambasada paralajmëron se së shpejti do të dalin emrat e zyrtarëve të tjerë shqiptarë, të përfshirë në raste të mëdha korrupsioni që nuk do shkelin më në SHBA.

DEKLARATA E AMBASADES

Qeveria e Shteteve të Bashkuara është e përkushtuar në luftën kundër korrupsionit dhe respektimin e sundimit të ligjit në mbarë botën. Lufta kundër korrupsionit është prioritet i punës së Ambasadës së Shteteve të Bashkuara në Tiranë. Këtë javë, ne do të shpjegojmë përcaktimet publike për korrupsion madhor sipas Nenit 7031(c) të legjislacionit të Shteteve të Bashkuara. Kur Shtetet e Bashkuara mësojnë se një zyrtar qeveritar i huaj është përfshirë në korrupsion madhor, Sekretari i Shtetit ka autoritetin të shpallë individët dhe anëtarët e familjes së tij/saj të afërt si të skualifikuar përgjithmonë për të hyrë në Shtetet e Bashkuara. #ShqiperiaLuftonKorrupsionin #NdalKorrupsionit