Mbrëmjen e djeshme kryeministri Edi Rama i ka shpallur luftë bandave dhe kriminelëve ose ndryshe siç quhen në gjuhën e përditshme : “ të fortët”.
Deklaratën e ashpër Rama e ka bërë teksa ishte i ftuar në emisionin “Opinion” ku ndër të tjera ka komentuar dhe aktualitetin në vend.
Shefi i qeverisë premtoi që brenda muajit nëntor ai do të dalë para popullit për të folur me emra për ata që i cilëson si “mollët e kalbura” të shoqërisë që do i heqë nga shporta me shumë kujdes.
Ndër të tjera Rama paralajmëroi se të arrestuarit do të përballen me një fakt që nuk ka ndodhur kurrë më parë, një trajtim të denjë për tu bërë shembull.
“Është reale, nuk është diçka fantazi që ka një problem me një tipologji njerëzish të një moshe të caktuar që përbëjnë këtë. Brenda nëntorit, unë do të dal para shqiptarëve dhe do të them: Ja çfarë është situata dhe çfarë do të bëjmë ne! Brenda nëntorit unë do të shpall para shqiptarëve një plan të posaçëm për të gjithë personat me precendentë krimal apo të skeduar si të përfshirë, të cilëve do t’ju rezervojmë një trajtim shumë të veçantë. Një trajtim që nuk i shkon mendja askujt këtu. Ne po punojmë për një plan. Kjo gjë që do të bëhet tani, ka ardhur koha dhe është mundësia të bëhet. Sepse Policia e ka fituar luftën në terren“, u shpreh Rama duke ngritur tonin e zërit.
