Ditën e sotme kryeministri Edi Rama ka prezantuar programin e asistencës antiburokratike për sipërmarrësit vendas dhe të huaj në Platformën e Bashkëqeverisjes.
Gjatë fjalës së tij Rama u shpreh me tone të ashpra se secili nga koordinatorët duhet të marrë autoritetin dhe përgjiegjësinë për të zgjidhur problemet dhe kërkesat e sipërmarrësve.
“Çdokush që është koordinator në kabinetin e ministrit për biznesin duhet të marrë menjëherë autoritetin dhe përgjegjësinë për të qenë në krye të detyrës 24 orë në 24 dhe duhet të jetë pika e referimit, pa humbur kohë duke pritur te dera e ministrit për të gjetur kohë ministri.”, tha kryeministri.
Ndër të tjera ai paralajmëroi se cdokush duhet të bëjë punën si duhet përndryshe nuk do të mbetet aty ku është dhe gjithashtu ka kujtuar dhe mesazhet jo të këndshme që herë pas here vinë në adresë të tij.
“Nuk dua që fjalia e fundit të jetë e hidhur por dua ta them edhe këtë. Dikush që nuk do ta bëjë punën si duhet nuk do të mbetet aty ku është, ta kenë të qartë dhe ju lutem shumë maksimumin e përkushtimit dhe kur lodheni vetëm kujtohuni për mua se sa herë më shumë mesazhe dhe komunikime do të bëj me njerëzit. Dhe kujtohuni dhe për faktin që komunikimi me njerëzit do të jenë lutje të tyre që t’i ndihmoni t’i mbështesni, unë i kam dhe me libër shtëpie të shoqëruar hera herës, por kjo është një zgedhje dhe nuk ka gjë më fisnike dhe privilegj më të madh sesa të jesh në pozicionin që të ndihmosh të tjerët, të mbështesësh të tjerët dhe kjo nuk është propagandë, kjo është e lidhur me thelbin e ekzistencës sonë si njerëz”, deklaroi Rama.
