Ngrënia e thonjve/ Ja si mund ti jepni fund vesit të keq

Thonë se duart janë bileta e parë e rregullsisë dhe e pastërtisë së një individi, kështu që kurimi i tyre është shumë thelbësor.

Por fatkeqësisht, disa persona kanë një zakon të keq, atë të të ngrënit të thonjve, zakon i cili kryesisht trashëgohet që nga mosha e fëmijërisë.

Zakonisht fillohet rreth moshës 10 vjeç ose edhe më parë, deri në moshën 18-20 vjeç, ndërsa më pas ndalohet me kalimin e kohës. Por ka rreth 10 për qind të të rriturve që vazhdojnë t’i hanë ende thonjtë e duarve të tyre.

Si mund të mos i hani më thonjtë

Nuk ekziston ende një kurë farmaceutike për onikofagjinë, por ka disa truke të vogla që mund të zbatohen për të shmangur tundimin. Nëse problemi juaj është me natyrë emocionale dhe psikologjike, para së gjithash duhet të luftoni stresin e ankthin dhe nëse është e nevojshme, ju këshillohet madje që të ndiqni një terapi për të gjetur shkaqet e problemit. Për femrat, një zgjidhje më se e vlefshme për të mos i ngrënë më thonjtë, është vajtja te estetistja për t’i bërë thonjtë me xhel ose me tipsa.

Një tjetër mënyrë e mirë është që të fotografoni çdo ditë thonjtë tuaj të pangrënë. Duke parë shkallën e zhvillimit, do të motivoheni të vazhdoni me përmirësimin. Duhet të keni parasysh se zakonet e vjetra nuk vdesin. Ato janë gjithmonë në ndërgjegjen tonë, duke pritur që të aktivizohen nga momenti në moment. Jini tolerant ndaj vetes, nëse gaboni në çaste të caktuara, duke menduar se betejat ndaj zakoneve të këqija fitohen duke mbajtur zgjuar ndërgjegjen.