LIGJET E BIZNESIT
Bashkëshortja e këngëtarit të mirënjohur Françesk Radi, Tefta Radi ka kujtuar mes lotëve se si ka qënë dita e fundit në krah të tij.
E ftuar mbrëmjen e djeshme në programin “Soiree” me Jonida Shehun, Radi tregoi se dita e fundit e jetës së artistit të madh ishte si një ditë e zakonshme.
Mes lotësh ajo tregon e përmalluar se Françesku më parë bëri dy orë e gjysmë prova për koncertin që kishin dhe më pas ranë të flinin por ai nuk u ngrit më.
‘Dita e fundit me Frankon ishte si një nga ditët tona të zakonshme, mjaft e lumtur. Ishte e dielë, më kishte ardhur vëllai nga Australia, ishim në Petrelë në një zonë të bukur, drekuam me miqtë tanë, me Mark Lulin dhe bashkëshorten e tij. Ishte një ditë plot humor, plot batuta, sepse një nga të veçantat e Frankos ishte humori i tij, buzëqeshja e tij e ëmbël dhe humori me batuta që të bënte të flakje tej çdo lloj nervozizmi.
Ishte një ditë e zakonshme, sepse të gjitha ditët tona ishin të bukura. U kthyem në shtëpi rreth orës 6. Pas gjysëm ore pushimi u fut në studion e tij. U ul për të punuar. Ishte duke përgatitur 5-6 këngë para se të largoheshim për në Australi në një recital që do të realizonte me tenorin Kastriot Tusha.
Ishin këngë të zgjedhura, këngë të bukura, napoletane, për t’i patur si kujtim dy miq. Kishim dy ditë që kishim filluar provat. Ndodhi ajo çudia që ndodhi. Punoi dy orë e gjysëm. Nga ora 9 u ulëm për të parë një koncert në Rai në Arena di Verona, bëhej me gratë artiste italiane me Loredana Bertè etj. dhe të gjithë fondet do të kalonin për gratë e dhunuara. Ishte koncert brilant. U kënaqëm dhe rreth orës 12-12:30 sa mbaroi koncerti dhe nga ora 1 ramë për të fjetur dhe Franko ra në një gjumë dhe nuk u ngrit më’, rrëfeu Tefta Radi.
