Ky është presidenti që dje theu rekordin botëror për fjalimin më të gjatë përpara gazetarëve

Ish-aktori i humorit Volodymyr Zelensky, i cili bëri shumë bujë në muajin prill me zgjedhjen e tij si president i Ukrainës, ka shënuar ditën e djeshme një rekord duke mbajtur një konferencë shtypi që zgjati për më shumë se nëntë orë.

Sipas Agjencisë Kombëtarë ukrainase të rekordeve kjo është konferenca më e gjatë në historinë botërore.

Tetë orë pas fillimit të konferencës e cila u mbajt në një sallë në qendër të Kievit, një përfaqësues i agjencisë u ngrit për të njoftuar rekordin.

Presidenti, Zelensky reagoi duke manifestuar befasinë e tij dhe duke konfirmuar se ishte një person modest dhe se i urrente festimet.
Rekordi i mëparshëm mbahej nga presidenti bjellorus, Alexandre Lukashenko, me një konferencë shtypi që zgjati më shumë se shtatë orë, sipas medias ukrainase.

Disa qindra gazetarë ukrainas dhe të huaj iu afruan Zelenskyt rreth një tryeze.

Presidenti ukrainas diskutoi për disa çështje të rëndësishme si konflikti në lindje të Ukrainës, marrëdhëniet me Rusinë apo bisedën e tij telefonike me presidentin amerikan, Donald Trump, zbulimi i të cilit ka bërë që ky i fundit të jetë nën kërcënimin e shkarkimit të ndërmarrë nga demokratët.