Kontrollet tek biznesi, paralajmëron Drejtoresha e Tatimeve: Tani tek punonjësit dhe pagat

Lufta kundër informalitetit do të fokusohet edhe tek pagat. Drejtoresha e Përgjithshme e Tatimeve, Delina Ibrahimaj zbuloi në A2 Business të gazetares Aurora Sulçes se janë identifikuar 7200 kompani që nën deklarojnë rrogat e punonjësve.

Në total, janë 13400 individë të identifikuar si të nën paguar në bazë të profesioneve të tyre. Përpara se të nisin kontrollet, Tatimet kanë dërguar fillimisht letra sensibilizuese ndaj bizneseve dhe vetë individëve që preken në të ardhmen nga vlera më e ulët e pensionit.
“Ka inxhinierë dhe ekonomistë që ne supozojmë se paguhen më pak sesa deklarimet e tyre. Janë njoftuar me letra dhe do të kontrollojmë nga më të mëdhenjtë te më të vegjlit, në mënyrë që kjo dukuri shqetësuese të zhduket”, tha Ibrahimaj.
Sa i takon kontrolleve për deklarimin e punonjësve, drejtoresha e Tatimeve shpjegoi se si po zhvillohen inspektimet.

“Do të verifikohen të gjithë subjektet të cilët janë pa të punësuar dhe me 1-10 persona të punësuar. Kjo nuk do të thotë që punësimet nuk do të kontrollohen edhe subjektet e tjera”.
Plani operacional kundër informalitetit njëkohësisht është shtrirë edhe në deklarimin e xhiros së kompanive për të ulur evazionin, ku do të ndihmojë nga prilli edhe procesi i fiskalizimit.