LIGJET E BIZNESIT
Kontrolli i Lartë i Shtetit (KLSH) vëren se klasifikimi i ndërtimit të rrugës Milot-Balldren si autostradë është i pajustifikuar bazuar në trafikun e parashikuar në studimin e fizibilitetit. Meqenëse kontrata parashikon që ky aks të jetë i kategorisë A (pra, autostradë), kostot e ndërtimit janë rritur nga 61.5 në 140 milionë euro, theksohet në raportin e KLSH-së.
Mandej, në raport KLSH-ja evidenton se ndërtimi i këtij aksi bie ndesh me standardet kombëtare të projektimit të rrugëve që rekomandojnë rrugë të kategorisë II/C, të quajtur interurbane kryesore. “Ky ndryshim i kategorisë së rrugës A dhe II/C i shoqëruar nga ndryshimet e tjera tekniko-ekonomike, kanë sjellë një rritje të kostove (nga 61.5 milionë euro në 140 milionë euro, në gjykimin tonë të panevojshëm për këtë investim, në raport me vëllimin e projektuar të trafikut dhe kushteve teknike të studimit të fizibilitetit, në të cilin mbështetet kjo kontratë”, shkruhet në raport.
Sikurse edhe në rastin e rrugës Orikum-Dukat, një problematikë tjetër e këtij koncesioni është sipas KLSH-së fakti se nga buxheti i shtetit, kompanitë e ndërtimit do të përfitojnë para për punë që nuk ekzistojnë. Bëhet fjalë për fonde që janë llogaritur si hua që do të merren nga koncesionarët, por që në të vërtetë janë para të panevojshme, duke marrë në konsideratë grafikun e punimeve. Interesat e këtyre fondeve përtej nevojave i faturohen më pas buxhetit të shtetit. Për të dy kontratat në fjalë, shuma shkon në 10 milionë euro.
Këto parashtrime, KLSH-ja ia ka dërguar me shkresë zyrtare kryeministrit Edi Rama, zv.kryeministrit Erjon Braçe, kryeparlamentarit Gramoz Ruçi dhe ministres së Infrastrukturës, Belinda Balluku, para miratimit në Parlament të kontratave. Megjithatë, kontratat u votuan në muajin shtator, edhe pasi presidenti i Republikës, Ilir Meta, e ktheu për rishqyrtim në Kuvend ligjin për kontratave Partneritet Publik-Privat (PPP) për ndërtimin e dy akseve të lartpërmendura, duke arsyetuar ndër të tjera se cënonin interesin e qytetarëve.
