Ditën e sotme deputeti i opozitës parlamentare Lefter Maliqi ka dalë në një deklaratë për shtyp nga selia e Kuvendit.
Maliqi ka komentuar situatën që po kalon aktualisht vendi ynë ku nuk ka harruar të përmendë dhe vrasjet, vjedhjet, trafikun e drogës etj.
Deputeti e ka cilësuar situatën në Shqipëri si alarmante dhe ka bërë thirrje që të gjithë duhet të ngrihen pasi fatet e vendit janë në rrezik nga krimi.
Ai e ka quajtur parlamentin si qesharak dhe se ata si deputetë nuk janë zgjedhur nga populli por nga kryetarët.
“Përshëndes kryeministrin e ardhshëm të Kosovës që me siguri do të jetë Albin Kurti, pavarësisht qëndrimeve që mbajtën edhe në Shqipëri për shkak të akuzave të tij edhe ndaj Baton Haxhiut i cili është njeriu më i urryer jo vetëm në Kosovë, që Rama e mban si këshilltar.
Duhet të ngrihemi, fatet e vendit janë në rrezik, krimi na rrezikon. Kryeministri akuzon edhe prokurorin dhe Prokurorinë e Durrësit si të lidhur me bandat. Ka ardhur koha të largohet dhe të rikthehet vota e lirë e shqiptarëve. 2 milion euro një rrugë. 11 km rrugë rurale i kam bërë si kryetar komune për 2 milionë euro. Ky është turp, vendi është në alarm.
Ju bëj thirrje gjithë shqiptarëve duke nisur vetes sime se ne, nuk jemi deputetë të zgjedhur nga populli, jemi të emëruar në lista nga kryetarët. Ky Parlament është qesharak, është një mandat qesharak. Po nuk u rrëzua ky sistem elektoral, po nuk u rrëzua kjo oligarki na bie të ikim të gjithë që nga unë i pari. Duket sikur jemi të qetë por jemi të qetë sepse kanë ikur të gjithë. Këtu kanë mbetur fukarenjtë, kanë ikur të rinjtë”, tha Maliqi gjatë fjalës së tij.
