Ishte në kërkim ndërkombëtar, arrestohet në Madrid 62-vjeçari nga Tirana (EMRI)

Një shqiptar 62 vjeçar i shpallur në kërkim ndërkombëtar është arrestuar ditën e sotme në Madrid, Spanjë.

Policia bën me dije se arrestimi i shtetasit Luan Bundo, erdhi pas një bashkëpunimi mes Interpol Tirana dhe Interpol Madrid.

Gjykata e Tiranës e dënoi me 10 vite burg 62-vjeçarin Luan Bundo, administrator i një kompanie sigurimesh, nën akuzën e dhënies së ndihmës për kalim të paligjshëm të kufirit.

Rasti i hetuar nga prokuroria i përkiste shtetasit Mensur Prençi, të cilit iu kërkuan plot 13 mijë euro për të mbërritur në Australi.

Pas arrestimit, po ndiqen edhe procedurat për ekstradimin e tij nga Spanja në Shqipëri.

NJOFTIMI ZYRTAR I POLICISE

Shkëmbimi në kohë i informacionit mes Interpol Tirana dhe Interpol Madridit vë në pranga një shtetas të dënuar me 10 vite burg

Policia e Shtetit ka marrë informacion në rrugë operative se një person i shpallur në kërkim ndërkombëtar mbrëmjen e djeshme ndodhej në një ambient, në Madrid të Spanjës.

Pas verifikimeve të shpejta rezultoi se të dhënat, i përkisnin personit të shpallur në kërkim ndërkombëtar.

Falë shkëmbimit shumë të shpejtë të informacionit  ndërmjet Interpol Tiranës, Interpol Madridit dhe Zyrës Ndërlidhëse të Policisë Spanjolle, u bë e mundur arrestimi në Madrid, i shtetasit Luan Bundo, 62 vjeç, nga Tirana.

PERMBLEDHJE E NGJARJES SE NDODHUR

Shtetasi Luan Bundo, i ka ofruar dhe dhënë ndihmë për kalimin e kufirit në mënyrë të paligjshme një shtetasi, për të shkuar në  Australi. Këtë ndihmë ai e ka ofruar dhe dhënë kundrejt shpërblimit të kërkuar prej 13.000 eurosh.

Shtetasi Bundo së bashku me shtetasin  M.P, fillimisht kanë shkuar në Maqedoni ku janë pajisur me viza për në Indonezi dhe më pas nga Indonezia për në Australi, janë transportuar nga një shtetas indonezian me peshkarexhë.

Gjykata e Rrethit Gjyqësor me vendim, datë 19.12.2016 ka shpallur fajtor shtetasin Bundon për veprën penale “Ndihmë për kalimin e paligjshëm të kufirit” dhe e ka dënuar me 10 vite burgim.

Interpol Tirana në bashkëpunim me Interpol Madridin po vijojnë proceduarat për ekstradimin e shtetasit të arrestuar drejt Shqipërisë.