Ditën e sotme Gjykata e Tiranës ka dhënë sot masën e arrestit me burg për tre banorët që ranë në pranga ditët e fundit për protestat e mbajtura në zonën e “Unazës së Re”.
Prej dy ditësh, policia dërgon efektivë në këtë zonë duke shoqëruar, arrestuar, duke bërë dhe kontrolle të herë pas hershme të zonës.
Banorët janë shprehur se mbi ta është përdorur dhe dhunë dhe pretendojnë se aksioni është kryer me urdhër të drejtpërdrejtë politik nga kryeministri Edi Rama.
Pas zhvillimit të këtyre ngjarjeve, kryetari i Partisë Demokratike Lulzim Basha ka njoftuar për një protestë që do të mbahet sot pasdite në orën 18.00 në zonën e Unazës së Re.
“Me urdhër të Edi Ramës, gjyqtari Arben Micko dhe prokurori Bledar Maksuti mbajtën sot në arrest Skender Dodën, Gramoz Shehun dhe Ilias Katiraj. Tre baballarë mbahen në burg sepse mbrojnë shtëpitë e fëmijëve nga Hajduti Psiqik, Damian Lala dhe Taulant Yaris Bego që duan të vjedhin 40 milionë euro te Unaza e Re.
Sot Edi Rama duhej të ishte në burg për veprën kriminale të pastrimit të parave dhe ndërhyrjes me para të pista në fushatën e Presidentit Obama. Damian Lala dhe Taulant Yaris Bega duhet të ishin në qeli, bashkë me Sajmir Tahirin për aferat e tyre hajdutërore dhe bashkëpunim me narkotrafikantët.
Me hajdutë në qeveri dhe njerëz të pafajshëm në burg, nuk ka Europë, as zhvillim, as drejtësi. Vetëm largimi i kësaj bande hap rrugën drejt normalitetit dhe mirëqenies.
Sot në ora 18:00 të bashkohemi në protestë në krah të banorëve të dhunuar te Unaza e Re, kundër hajdutërisë dhe padrejtësisë.”, u shpreh Basha gjatë një prononcimi për gazetarët.
