Djegia e makinës së kryebashkiakut të Vlorës/Noka: Luftë mes bandash

Ish-deputeti i Partisë Demokratike, Flamur Noka, ka reaguar në lidhje me ngjarjen e paradites së sotme ku u shkrumbua makina e kryebashkiakut të Vlorës, Dritan Leli.

Me anë të një konference për shtyp,Noka tha se ishin bandat e krimit të organizuar ato që kishin kërcënuar Lelin për tokën në Jalë duke mos lënë pa përmendur edhe faktin që brenda një kohë të shkurtër në Vlorë kanë dhënë dorëheqjen njëri pas tjetrit.

Sipas Nokës, pasi bandat kishin financuar fushatën e PS-së tani kërkojnë që në këmbim të marrin prona në bregdet.

“Në Vlorë po vepron krimi i organizuar që Edi Rama i ka dhënë pushtet, për arsyen e vetme se është krimi i organizuar që financon fushatën e Partisë Socialiste dhe që e ndihmon Edi Ramën të blejë vota e të vjedhë zgjedhjet. Është një bandë e krimit të organizuar për të gllabëruar toka në bregdetin e Jalit, kundër bandës së qeverisë, që po e grabit atë me klientët e Edi Ramës, të cilëve u jep statusin e investitorit strategjik për të grabitur dhe betonizuar Rivierën shqiptare,”-tha Noka.