Zbulohen detaje të reja nga vrasja e trefishtë në fshatin Xibër të Klosit, ngjarje e cila tronditi mbarë opinionin publik ditën e sotme.
Sipas asaj që raporton News 24, mollë sherri mes dy vëllezërve dyshohet se ka qenë një gardh, ndonëse ky fakt nuk është konfirmuar ende nga organet e hetimit.
Ndërkohë konfirmohet se, vrasja ka ndodhur për çështje pronësie, ku vëllai ka qëlluar me breshëri plumbash vëllanë e tij, i cili është shtrirë në tokë i mbuluar në gjak.
Menjëherë pas ngjarjes, pasi djali ka parë babanë e tij në tokë, ka ndërhyrë për t’i dhënë ndihmë, por është qëlluar edhe ai nga xhaxhai.
Mësohet gjithashtu se, babë e bir nuk kanë ndërruar jetë në vendngjarje, por për shkak të largësisë mes banesës dhe spitalit të qytetit, ata kanë ndërruar jetë gjatë transportimit.
Më pas, autori, pasi ka marrë vesh humbjen e dy jetëve, ka vendosur të vetëvritet.
Viktimat janë, Kujtim Dakuci 52 vjeç, i biri i tij, Flogerti 19 vjeç, ndërsa autori Sali Dakuci 55 vjeç.
Njoftimi i Policisë për ngjarjen:
Me datë 01.10.2019, rreth orës 14.24, në fshatin Xibër, Bashkia Klos, në rrethana ende të paqarta shtetasi S.D, ka vrarë me armë zjarri pistoletë vëllain shtetasin K.D dhe djalin e këtij të fundit shtetasin F.D dhe më pas shtetasi S.D ka vrarë veten. Grupi hetimor ka shkuar në vendngjarje dhe po punon për zbardhjen e plotë të ngjarjes.
