Dënimi 3.4 vite burg/ Avokatët e Jaeld Çelës apelojnë vendimin, ja ç’do bëjë Saimir Tahiri të enjten

Ditën e sotme avokatët e ish-drejtorit të policisë së Vlorës Jaeld Çela kanë apeluar vendimin e Gjykatës së Krimeve të Rënda.

Kujtojmë se Çela u dënua për “shpërdorim detyre” nga Krimet e Rënda me 5 vite burg, të cilat iu ulën në 3.4 për shkak të gjykimit të shkurtuar.

Jaeld Çela akuzohej së bashku me ish-ministrin e Brendshëm Saimir Tahiri për favorizim të trafikut të drogës.

Nga ana tjetër ish-ministri i Brendshëm Saimir Tahiri pritet të paraqesë ditën e enjte apelimin për vendimin e gjykatës së marrë ndaj tij.

Gjykata vendosi që të rrëzonte akuzat për grup të strukturuar kriminal, kryerje të veprave penale në kuadër të grupit kriminal dhe trafik droge për Çelën duke e dënuar vetëm për shpërdorim detyre.

Ndërkohë me akuzën ‘për shpërdorim detyre’ u dënua edhe Tahiri, por ndryshe nga Çela, i cili është në kërkim, për ish ministrin dënimi u konverta në shërbim prove.