Albin Kurti ‘zhvishet’ nga kostumi i politikanit, rrëfen si u njoh me bashkëshorten norvegjeze

Kandidati për kryeministër në Kosovë, lideri i “Vetëvendosje” Albin Kurti ka dhënë një intervistë jashtë statusit të tij si politikan.

Fituesi i zgjedhjeve të parakohshme të 6 tetorit në Kosovë rrëfen se si është njohur me bashkëshorten e tij norvegjeze Rita Knudsen Augestad, me të cilën ka dhe një vajzë 5 vjeç.

Kurti kthehet pas në kohë dhe zbulon se me bashkëshorten, me profesion gazetare është njohur në Prishtinë, gjatë kohës kur ajo transmetonte lajmet nga Kosova për një gazetë në Norvegji.

Ndër të tjera ai shton se jeta e tij tashmë ndahet mes Kosovës dhe Norvegjisë, pasi vajza dhe gruaja e tij kalojnë kohë në të dy shtetet.

“Në vitin 2014 ka lindur vajza ime dhe unë jam arrestuar disa herë dhe përdorimi i gazit lotsjellës i përdorur nga policia në protesta, është bërë pikërisht në kohën kur vajza ime ishte 1 vjeç e gjysmë. Nuk mendoj se rrethanat familjare më kanë ndryshuar në këtë aspekt. Sigurisht, nuk jam i njëjti si me familjen dhe si pa familjen. Për sa i përket bindjeve të mia politike dhe veprimeve që ndërmarrë, nuk kanë dallime.

Me bashkëshorten time jam njohur në Prishtinë, ajo ka qenë gazetare dhe ka shkruar artikuj për një gazetë në Norvegji. Vajza dhe bashkëshortja kalojnë kohë edhe në Kosovë edhe në Norvegji, ne gjatë verës shkojmë më shumë në Norvegji.

Gruaja ime ka familjen atje dhe natyrisht unë do jem përgjegjës para qytetarëve të Kosovës, por kjo s’do të thotë që unë s’do shkoj asnjëherë në Norvegji“, shprehet Albin Kurti për “FaxNews”.