Ditët e fundit një nga temat më të diskutuara në ekran dhe jo vetëm, janë pikërisht tërmetet, ku në memorien e të gjithëve sapo përmendet si fjalë, vjen lëkundja e fuqishme 5.8 ballë e shkallës Rihter më 21 shtator, tërmet i cili tronditi kryesisht Tiranën dhe Durrësin, duke përhapur kështu një panik që nuk ishte parë kurrë ndonjëherë më parë.
Por edhe pse të gjithë bisedojnë dhe flasin për këtë lëkundje, kujtojmë se ky nuk ishte i vetmi tërmet i fortë që goditi Shqipërinë për këtë vit.
Askush nuk do të harrojë tërmetin tjetër të fuqishëm që goditi Korçën, me epiqendër fshatin Floq dhe me magnitudë 5.3 ballë të shkallës Rihter, ku mbetën të plagosur 4 persona dhe u shkatërruan mbi 100 shtëpi.
Edhe pse ditët e fundit për shkak të tërmetit tjetër të madh duket sikur këta banorë së bashku me problemet që iu la kjo goditje janë lënë në hije, një thirrje për ndihmë vjen në redaksinë e Fast News Albania, nga një banore e fshatit Ravonik, nënë e dy fëmijëve të sëmurë, së cilës tërmeti i fuqishëm i 1 qershorit i ka lënë pasoja të rënda në banesë.
Ashtu siç duket edhe nga fotot dhe videot që gruaja ka dërguar në redaksinë tonë, dëmet në muret e banesës për shkak të lëkundjeve janë aq të rënda sa shtëpia është bërë tashmë e pabanueshme për të dhe familjen e saj.
Zonja shprehet e shqetësuar duke thënë se të dy fëmijët i ka të sëmurë dhe nuk mund të qëndrojë në banesë në këto kushte të mjerueshme.
Ndër të tjera ajo shton dhe problemin tjetër ku shkruan se është paraqitur përditë në Bashkinë e Korçes por ende nuk ka asnjë reagim nga ky institucion.
Po ashtu nëna e dy fëmijëve shton se gjendja është alarmante dhe se ditët e fundit që ka filluar edhe shkolla gjërat janë vështirësuar pasi nuk ka ku të lajë dhe ndërrojë fëmijët dhe po flenë ku i zë nata.
“ Ju lutem më ndihmoni, kam që nga data 1 qershor që po fle bashkë me fëmijët dhe burrin ku na zë nata. Shtëpia më është dëmtuar aq shumë sa është bërë e pabanueshme. Po shkoj cdo ditë në Bashkinë e Korcës dhe ende nuk ka asnjë reagim. Më thonë do vijmë sot dhe nesër, u bë katër muaj dhe akoma asgjë. Tërmeti tjetër para dy ditësh më rrëzoi murin e shtëpisë në tokë.Të dy fëmijët I kam të sëmurë dhe me zor siguroj bukën e gojës dhe po i mbaj ku na zë nata.Tani që filloi shkolla nuk kam ku ti laj e ti ndërroj, në shtëpi nuk afrohen nga frika pasi kaluan një trembje shumë të madhe”, shkruan banorja në mesazhin e saj dërguar për redaksinë tonë.
Thirrja e një gruaje për ndihmë, klithma e një nëne në kushte të vështira e dëshpëruese është një mesazh që duhet ta dëgjojnë në mënyre urgjente të gjitha organet kompetente, të gjithë institucionet shtetërore, Bashkia e Korçës, ministria e Brendshme, ministria e Shëndetësisë, Kryeministria e shumë të tjera që kanë për detyrë, ashtu si në çdo vend demokratik, ti përgjigjen problemeve të qytetarëve, të cilët në këto momente të vështira fatkeqësie natyrore, rrinë me sytë nga qielli në pritje të një ndihme të munguar nga autoritetet që e kanë për detyre ta ofrojnë atë nga toka./ Fastnewsalbania
