LIGJET E BIZNESIT
E hëna do të shënojë ditën e parë të shkollës dhe rrjedhimisht, pritet të ketë një trafik të rënduar. Policia Bashkiake ka njoftuar për një plan masash, me qëllim sigurimin e një qarkullimi normal dhe pa vonesa.
Shërbime të përforcuara të uniformave blu do të jenë në kryqëzimet kryesore të kryeqytetit, ndërsa qytetarëve u kërkohet që të shmangin përdorimin e automjeteve personale.
“Do fillojnë në ditën e parë të shkollës rreth 55 mijë nxënës në Bashkinë e Tiranës.
Nëse të gjithë prindërit dhe mësuesit do t’i dërgojnë fëmijët e tyre në shkollë me mjet, trafiku do të vështirësohet. E mira është që të na mirëkuptojnë dhe ditën e parë të shkollës t’i shmangin sa më shumë mjetet në ato distanca të shkurtra që mund të arrihen qoftë në këmbë, me mjete të transportit publik, etj”, deklaroi Ermal Kapllani, drejtor i Policisë Bashkiake.
Gjithashtu, efektivët do të jenë të pranishëm në rrugët hyrëse të qytetit për të mos lejuar lëvizjen e furgonëve që transportojnë mallra në orët e mëngjesit. “Bizneset të shmangin orarin e kufizimit të lëvizjes së mjeteve. Që është ora 07:00 deri në orën 09:00”, u shpreh Kapllani.
Policia bashkiake po merr masa paraprake për të mos lejuar asnjë shitës ambulant në afërsi të shkollave 9 vjeçare e të mesme.
