Takimi me të dërguarit e Komisionit të Venecias, Lleshaj: Shmangëm skenarët apokaliptikë

Pas takimit me të dërguarit nga Komisioni i Venecias ka ardhur reagimi nga ministri i Brendshëm, Sandër Lleshaj.

Përmes një postimi në rrjetet sociale, Lleshaj thekson se në takimin me delegacionin e Venecias u diskutuan ngjarjet e ndodhura në protestat e Opozitës gjatë pranverës.

Sipas Lleshajt ai është shprehur krenarë para tyre që u arrit me sukses që të shmangen skenarët apokaliptikë.

Postimi i plotë i ministrit Lleshaj:

Sot pata nderin dhe përgjegjësinë për të shprehur përpara një delegacioni të Komisionit të Venecias, vlerësimet e mia lidhur me zhvillimet politike të këtij viti të ngarkuar me ngjarje të pazakonta, që kulmuan me përpjekjet e shumëfishta për të cenuar të drejtën e zgjedhjeve demokratike në vend.

Theksova se përpjekjet e dhunshme për destabilizim, nuk arritën të shndërrohen në ndonjë kërcënim serioz për sigurinë e vendit, falë pjekurisë së qytetarëve shqiptarë, që nuk u bënë pjesë e skenarëve të dhunës dhe e profesionalizmit të Policisë së Shtetit dhe strukturave të tjera ligjzbatuese.

Ishin pikërisht këta faktorë, të cilët mundësuan që zgjedhjet vendore të zhvilloheshin rregullisht dhe që skenarët apokaliptikë, të imagjinuar apo të dëshiruar, nuk u bënë realitet dhe që Shqipëria të mos binte në një qerthull të rrezikshëm destabiliteti.

Takimi me përfaqësuesit e Komisionit të Venecias ishte mjaft profesional dhe me shumë përmbajtje.