“Shefi im i madh” Tahiri nuk i ndal mesazhet e koduara, nxjerr foton me Ramën në sallën e gjyqit

Pas rreth dy orësh, ka përfunduar seanca gjyqësore ndaj ish-ministrit të Brendshëm Saimir Tahiri, seancë kjo e cila u mbajt te Gjykata e Krimeve të Rënda, ndërkohë që pritet të jepet vendimi final në orën 16.00.

Mësohet se ish-ministri Tahiri ka nxjerrë në sallën e gjyqit disa faqe të printuara të gazetave dhe portaleve, ku shfaqet me kryeministrin Edi Rama duke dhënë arsyet se pse sipas tij asnjëri prej tyre nuk janë “ Shefi i Madh”, sic del në përgjimet e Prokurorisë.

Ish-ministri ndër të tjera ka deklaruar në gjyq se në kohën kur trafikantët në përjgime flasin për “shefin e madh”, ai ka qenë në Gjermani në një takim me Komisionerin për Zjerim dhe me t’u kthyer ka shkuar në Dajt, në një takim me Ramën dhe qeverinë.

Për këtë arsye, Tahiri ka thënë se përgjimi i Prokurorisë nuk qëndron dhe se nuk është ai “shefi i madh”, duke pretenduar se ka qenë në takime zyrtare.

“As unë dhe as Rama nuk mund të jemi ‘shefi i madh’, por në raport me politikën, sigurisht që ai ka qenë shefi im i madh”, ka thënë Tahiri para trupës gjykuese.

Tahiri mësohet se ka lëshuar dhe disa mesazhe të koduara, që duket se janë për anëtarët e qeverisë, teksa tha “nuk keni parë gjë akoma” apo “nuk ka bir..”.

”S’ka bir k***, nuk keni parë asgjë akoma. Kam punuar në krye të ministrisë së Brendshme edhe kur më vunë bombat tek shtëpia. Ajo që dua është vetëm drejtësi”-është shprehur Tahiri.

I gjithë procesi është ndjekur edhe nga ndërkombëtarët, të cilët kanë qenë të pranishëm edhe sot në sallën e gjyqit.

Madje, seanca e sotme ka ngjallur edhe interesin e mediave të huaja, të cilat kanë ndjekur këtë proces.

Ndërkohë, të pranishme kanë qenë edhe dy zonja nga ambasadat, të cilat kanë qenë të ulura në fund të sallës dhe kanë monitoruar gjatë gjithë kohës.