“S’del gjallë që këtu ti ore”/ Sherr në autobuzin e Tiranës së Re, i riu thyen arrestin e shtëpisë dhe dhunon shoferin (VIDEO)

Mbrëmë pasagjerët e njërit prej autobuzëve të ‘Tiranës së Re’ kanë përjetuar momente paniku.

Njëri prej udhëtarëve është konfliktuar me shoferin, pasi pas pritjes së gjatë në stacion, shoferi po vonohej shumë dhe në ecje.

Video është postuar nga “JOQ”, dhe një nga pasagjerët rrëfen se kanë përjetuar moment frike duke qenë të detyruar të prisnin të mbyllur brenda pasi shoferi nuk hapte dyert e autobuzit, derisa  të vinte policia.

Më pas Policia me anë të një njoftimi ka zbardhur sherrin e ndodhur, ku njofton se bëhet fjalë për një të dënuar, i cili ndodhej në arrest shtëpie, dhe ka  thyer këtë urdhër duke u konfliktuar me shoferin vetëm pse ky i fundit nuk po ecte shpejt.

Mësohet se 23-vjeçari me iniciale A.K  e ka goditur shoferin me mjete të forta në pjesën e fytyrës dhe më pas është arrestuar nga policia.

NJOFTIMI ZYRTAR I POLICISE

Tiranë, Thyen masën e sigurisë “Arrest shtëpie” dhe më pas konfliktohet për motive të dobëta me shoferin e autobusit të një linje urbani duke e goditur me mjete të forta, vihet në pranga nga Policia 23-vjeçari. Në pranga dhe një tjetër shtetas i shpallur në kërkim për veprën penale “Përndjekje”.

Shërbimet e Komisariatit të Policisë Nr.2, në vijim të punës për parandalimin, evidentimin dhe goditjen e paligjshmërisë, arrestuan në flagrancë shtetasin:A. K., 23 vjeç, banues në Tiranë (me precedentë të mëparshëm penal).

Shtetasi i mësipërm ka thyer masën e sigurisë “Arrest shtëpie” duke dalë nga shtëpia dhe më pas është konfliktuar për motive të dobëta (pse autobuzi nuk ecte shpejt), me shoferin e autobusit të një linje urbani duke e goditur me mjete të forta në pjesën e fytyrës. Pas marrjes së njoftimit shërbimet e policisë kanë mbërritur menjëherë në vendngjarje ku dhe arrestuan në flagrancë shtetasin A. K., për veprat penale “Plagosje e lehtë me dashje” dhe “Largim i të burgosurit nga vendi i qëndrimit”.

Gjithashtu nga shërbimet e Komisariatit të Policisë Nr.2. u bë kapja dhe ndalimi i shtetasit: F. Z., banues në Tiranë. Ky shtetas është person i shpallur në kerkim, pasi Gjykata e Rrethit Gjyqësor Tiranë, e ka dënuar me 8 muaj burg për veprën penale “Përndjekje”.

Materialet i kaluan për veprime të mëtejshme Prokurorisë së Rrethit Gjyqësor Tiranë.