Rudina Hajdari i bën sfidë Ramës: Koncesionet do t’i çojmë në SPAK

Kryetarja e grupit parlamentar demokrat në Kuvend, deputetja Rudina Hajdari ishte shumë e ashpër në lidhje me procedurën që u ndoq në Parlament për të kaluar koncesionet koncesion Milot-Balldren dhe Orikum -Dukat. Sipas saj koncesionet e këtyre dy rrugëve duhet të dorëzohen në SPAK, sapo institucioni të ngrihet.

Duke folur sot në seancën plenare ku po diskutohen dekretet e Presidentit, Hajdari tha se “kontratat koncesionare të fundit të Milot-Balldren dhe Orikum -Dukat vijnë si oferta të pa kërkuara. Si ligji “Fusha”, këto janë kontrata që qeveria kërkon të mbulojë paligjshmërinë përmes votës së deputetëve. Ministria e Ekonomisë nuk ka dhënë miratimin për këto dy projekte, që rrezikojnë buxhetin e shtetit”.

Për Hajdarin shkeljet e rënda do të bëjnë me faj të gjithë aktorët nga ministri e deri te specialisti i thjeshtë.

“Shkeljet e rënda ngarkojnë me përgjegjësi nga specialisti më i thjeshtë deri te vendimmarrja e Këshillit të Ministrave. Ne duhet të bëjmë kallëzime në lidhje me këto dy ligje. Edhe nëse nuk merret Prokuroria e Përgjithshme, duhet t’i denoncojmë nga ligji ‘Fusha’ deri te koncesionet e rrugëve. Këto dosje duhet të dorëzohen sapo të ngrihet SPAK-u. Duhet të mbrojmë të drejtën tonë”, tha Hajdari sot në parlament.