Rama me tone të ashpra në grupin e PS: Po vazhuam kështu, dijeni se do e humbasim pushtetin

Kreu i qeverisë, Edi Rama, gjatë mbledhjes ditën e sotme më me Grupin Parlamentar, ka shprehur pakënaqësi për disa nga deputetë të PS.

Burime për “Panorama”, bëjnë me dije se Rama ka paralajmëruar edhe për largime, ndërsa ka kërkuar që të gjithë të jenë në krye të detyrës, dhe të kryejnë takime reale me njerëzit për t’u njohur me problematikat, përndryshe rrezikojnë të humbin pushtetin.

Rama është shprehur se mënyra e vetme për të mos bërë të njëjtat gjëra dhe të mos shkojnë në zgjedhje “për të humbur”, është transformimi i PS.

“Ato takime me të njëjtat fytyra, me të njëjtat pazare, me të njëjtat dallavere duhet të marrin fund.

As PS dhe as unë se mbajmë dot me këtë maskaradë, këto zullume, që bëhen nëpër zyrat e shtetit.

Merruni seriozisht me këtë punë. Nuk mban më… Mbajeni mend që humbim pushtetin nëse vazhdojmë kështu. Ju mbajeni sa të doni, sepse unë s’do pres fundin, as ju”, është shprehur kreu i ekzekutivit.

Pjesë nga fjala Ramës:

“Ky proces zgjedhor duhet të jetë ndryshe nga të tjerët. Me maksimumin e përkushtimit dhe cilësisë. Kush nuk e bën ta konsiderojë si kërkesë për dorëheqje nga grupi parlamentar dhe karriera në grupin parlamentar.

Deputetë që s’kanë dijeni ku kanë zonën, çfarë duan njerëzit, çfarë kërkesash kanë…. Kjo është e patolerueshme.

Një pjesë e mirë janë në rregull, por një pjesë e vogël s’dimë se çfarë tu themi më. T’i kthejnë PS atë që i kanë marrë. Secili duhet të bëjë detyrën asgjë më tepër. Takime reale në çdo organizatë, takime të vërteta, iventare të burimeve njerëzore që kemi.

PS s’mund të qëndrojë në pushtet duke ngrënë dhjamin e vet. S’mund të shkojmë në zgjedhje dhe të përsërisim të njëjtat gjëra, sepse do shkojmë të humbim. Ka një mënyrë për ta kaluar këtë gjë, të transformojmë PS.

Ato takime me të njëjtat fytyra, me të njëjtat pazare, me të njëjtat dallavere duhet të marrin fund.

As PS dhe as unë se mbajmë dot me këtë maskaradë, këto zullume, që bëhen nëpër zyrat e shtetit.

Sa here keni vajt në një zyrë shteti për të parë si funksionon, ca heqin njerëzit? S’keni ngritur asnjëherë asnjë shqetësim sesi funksionojnë zyrat e shtetit. Ju interesoheni vetëm për drejtorët.

Kush ikën dhe kush vjen?

Merruni seriozisht me këtë punë. Nuk mban më… Mbajeni mend që humbim pushtetin nëse vazhdojmë kështu. Ju mbajeni sa të doni, sepse unë s’do pres fundin, as ju.