Sajmir Tahiri ka reaguar pas vendimit të dhënë nga Gjykata për 5 vjet dënim për shpërdorim detyre. Ai ka deklaruar se do të vazhdojë betejën ligjore në Apel dhe deklaroi se nesër do të dalë para medias për të komunikuar me publikun.
“Më lanë pa fjalë sesi gjykata më quajti mua përgjegjës për shpërdorim detyre sesi disa kushërinj përdorën emrin tim. Jam kureshtar ta dëgjoj dhe ta rilexoj atë që dëgjova. Është vendim qesharak. Do të ishte shumë më fisnike ta kishin bërë si burrat dhe të më dënonin për trafik droge. Duhet të mbajmë përgjegjësi për të gjithë kushërinjtë idiotë që kemi”, deklaroi Tahiri.
DEKLARATA E PLOTË E SAJMIR TAHIRIT:
Mu duk një gjë e tipit, je i pafajshëm po s’kemi këllqe ta themi. Dy vjet jam emëtuar si trafikanti më i madh i Shqipërisë, jam emëtuar si pjesë e një grupi kriminal, sot gjykata thotë që “jo nuk je trafikant”. Me sa kuptova, meqë kushërinjtë paskan përmendur emrin tënd, ju keni shpërdoruar detyrën. Kjo nuk është një fitore, por fillimi i një beteje.
Gjykata thotë që nuk je pjesë e grupit kriminal, nuk ke bërë trafik droge, nuk ke ndihmuar në trafik droge. Por me aq sa kuptoj është se kushërinjtë e mi kanë përdorur emrin tim. Cfarë tu them, ishalla nuk përdorin kushërinjtë tuaj edhe emrin tuaj.
Kjo është maja e betejës sime. Më lini kohë deri nesër se edhe mua më duhet kohë ta përtyp. Më lanë pa fjalë sesi gjykata më quajti mua përgjegjës për shpërdorim detyre sesi disa kushërinj përdorën emrin tim. Jam kureshtar ta dëgjoj dhe ta rilexoj atë që dëgjova. Është vendim qesharak. Do të ishte shumë më fisnike ta kishin bërë si burrat dhe të më dënonin për trafik droge. Duhet të mbajmë përgjegjësi për të gjithë kushërinjtë idiotë që kemi. Nesër do të flasë përmes jush edhe për qytetarët.
Nuk ka diskutim që do të vazhdoj betejën në Apel. Është si të shkosh në një provim dhe të kesh mësuar shumë mire dhe mësuesja të të vendosë 5. Procesi i shekullit që zgjati dy vjet u katandis kokoshi një thelë.
