Ditën e sotme presidenti Ilir Meta ka pritur në zyrën e tij dy qytetarë që rrezikuan jetën dy ditë më parë duke ndaluar Fitim Babocin të vriste me kallashnikov një person përpara godinës së Bashkisë Kavajë.
Meta falenderon dy qytetarët Ymer Xhafa dhe Bajram Shala, të cilët iu hodhën sipër atentatorit dhe i kapën kallashnikovin me të cilin plagosi 53 vjeçarin Rexhep Tare.
Kreu i Shtetit thotë se këta persona janë shembuj frymëzues që i duhen mbarë shoqërisë tonë, për të qëndruar larg konflikteve, dhe për të reaguar kundër dhunës, krimit por dhe indiferencës, që rrezikon jetën, pronën e sigurinë qytetare.
“Kënaqësi e veçantë të takoja sot dy qytetarë të mrekullueshëm të Kavajës, z.Ymer Xhafa dhe z.Bajram Shala, të cilët dy ditë më parë rrezikuan jetën e tyre për të neutralizuar një shtetas të armatosur në qendër të qytetit, i cili plagosi një shtetas tjetër, ngjarje që mund të kthehej në një tragjedi të madhe.
I falenderova përzemërsisht për aktin e tyre të lartë qytetar, në mbrojtje të jetës, paqes sociale dhe sigurisë publike.
Shembuj të tillë frymëzues i duhen mbarë shoqërisë tonë, për të qëndruar larg konflikteve, dhe për të reaguar kundër dhunës, krimit por dhe indiferencës, që rrezikon jetën, pronën e sigurinë qytetare”, shrkuan Meta krahas fotos me Xhafën dhe Shalën në Facebook.
