OKB/ Rama kërkoi njohjen e Kosovës nga Serbia, ja si reaguan mediat serbe

Në fjalën e mbajtur mbrëmjen e djeshme në Organizatën e Kombeve të Bashkuara kryeministri Edi Rama apeloi Serbinë që të njohë pavarësinë e Kosovës, duke lënë mënjanë “inatet” e vjetra.

Ndaj një deklarate të tillë ka reaguar me ironi përfaqësuesja e Serbisë, e cila u kap nga kamerat duke tundur kokën, teksa fliste Rama për Kosovën.

Por kërkesa e Ramës bëri jehonë edhe në mediat serbe. Por ndryshe nga herët e tjera, ato nuk e konsideruan thirrjen si provokim, por raportuan me korrektësi deklaratën.

“Rama: Ka ardhur koha që miqtë tanë serbë ta njohin pavarësinë e Kosovës”, ishte titulli i shkrimit në median serbe “Sputnik”,  e cila vijon më tej duke cituar kryeministrin shqiptar, Edi Rama si vijon: “ka ardhur koha që të gjitha vendet e këtij Kuvendi, veçanërisht miqtë tanë serbë, ta njohin pavarësinë e Kosovës” dhe ta pranojnë, argumenton ai, realitetin si bazën e vetme të besueshme për ndërtimin e një të ardhme më të mirë të përbashkët”, theksohet në shkrim.