Nesër fiket sinjali për transmetimet analoge në Tiranë dhe Durrës, shtyhet data për Vlorën

Prej ditës së nesërme në Tiranë dhe në Durrës do të ndërpritet sinjali analog i transmetimeve për të kaluar në atë dixhital.

Sot është dita e fundit e transmetimeve analoge në këto dy qarqe.

Këtë AMA e kishte bërë të ditur më parë, ndërsa në qarkun e Vlorës bllokimi i sinjalit analog do të shtyhet për një datë tjetër. Kjo datë nuk është bërë e ditur.

Autoriteti i Mediave Audiovizive parashikon që kanalet të shihen vetëm përmes transmetimeve dixhitale. Qytetarët nuk do të kenë më të drejtë që të shohin kanalet televizive në transmetim analog.

Teleshikuesit duhet të pajisen me dekoder dixhital tokësor të tipit DVB-T2- Universal. Edhe një aparat televizori që ka të inkorporuar këtë dekoder, është i vlefshëm.