Misteri që rrethon aksidentin e vëllait të deputetes së LSI, pse kishte targa ruse makina?

Mbrëmjen e djeshme në dalje të Tiranës në vendin e quajtur rreth rrotullimi i Shqiponjës ndodhi një aksident i frikshëm, ku një mjet luksoz tip foristradë u përmbys. Makina e blinduar në pronësi të Eldin Dergjini ishte e përmbysur dhe me targa ruse.

Fill pas ngjarjes në vend mbërritën forcat e policisë që i habiti një fakt disi i çuditshëm. Ata nuk  gjetën aty pronarin e mjetit, Eldin Dergjinin, i cili kishte mundur të dilte nga mjeti dhe kishte shkuar drejt spitalit për të marrë mjekimin e nevojshëm.

Pas kësaj ajo që tërhoqi vëmendjen e hetuesve ishte dhe targa e makinës, shtuar faktin që shtetasi i përfshirë në këtë ngjarje ishte vëllai i deputetes së dalë nga listat e LSI, Amra Barova.

Pista kryesore e hetimit tashmë është orientuar drejt një atentati të mundshëm, që është përforcuar pas dëshmisë së 34-vjeçarit, i cili iu ka thënë hetuesve se ishte një makinë që e ndiqte nga pas dhe që e ka goditur në momentin e aksidentit.