Sekretari i Përgjithshëm i PD, Gazment Bardhi ka komentuar deklaratën e presidentit Meta sot se ka një pakt mes Bashës dhe Ramës.
Sipas Bardhit nuk ka asnjë pakt midis kryeministrit Edi Rama dhe kryetarit të PD-së, Lulzim Basha.
I ftuar në studion e lajmeve në RTV Ora, Bardhi u shpreh se nuk do të ketë pakt pa u plotësuar kushtete opozitës për zgjedhje të lira e të ndershme.
Presidenti la të kuptohet se ka sinjale për një pakt Rama-Basha. Është e vërtetë?
Gazment Bardhi: Nuk e kuptova kështu deklaratën e presidentit të republikës. Ajo që unë dua të konfirmoj është se nuk ka asnjë pakt dhe nuk do të ketë asnjë pakt pa u plotësuar kushtet për zgjedhje të lira e të ndershme. Nuk është çështje pakti mes dy individëve, por e parimeve dhe standardeve që të mos kemi më një krizë të tillë institucionale, kushtetuese, politike, përfaqësimi, siç e quan Presidenti në të ardhmen. Pra, do të duhet të jetë një zgjidhje e tillë që e fut Shqipërinë në një rrugë që të gjithë e dëshirojmë, anëtarësimin në BE.
