LIGJET E BIZNESIT
Ditën e sotme në orën 10:00 presidenti Ilir Meta do të paraqitet përpara Komisionit të Posacëm Hetimor parlamentar, ngritur nga mazhoranca për shkarkimin e tij.
Kjo është hera e parë në historinë e Shqipërisë që një president përballet me një Komision Hetimor për t’u pyetur si i dyshuar mbi shkeljen e Kushtetutës, iniciuar kjo nga maxhoranca socialiste, por dhe hera e parë në historinë pluraliste të vendit që Parlamenti nis procedurën e shkarkimit të kreut të shtetit, e cila duhet të finalizohet me një interpretim nga Gjykata Kushtetuese, e cila ende nuk është kompletuar me anëtarët e saj.
Mësohet se në këtë përballje, Presidenti do të shoqërohet nga 3 këshilltarë: Keshilltari per Sigurine, Bahri Shaqiri; Keshilltari Ligjor, Bledi Dervishaj dhe Keshilltari per Mediat, Tedi Blushi.
Pritet me interes strategjia që do të ndjekë Presidenti përballë këtij komisioni, nëse ai do të mjaftohet duke lexuar argumentet e dërguara në mënyrë shkresore Komisionit Hetimor përmes një shkrese prej 25 faqesh, apo do të preferojë që këtë seancë ta zhvillojë përmes pyetje-përgjigjeve.
Po me aq interes pritet edhe qëndrimi i Presidentit në raport me kryetarin e Komisionit Hetimor, Ulsi Manja, për të cilin Presidenca nuk është kursyer t’i përmendë një bisedë audio pas zgjedhjeve në Dibër, publikuar nga gazeta “Bild”.
Komisioni Hetimor është vetëm një nga hapat që ka ndërmarrë maxhoranca, për të arritur te shkarkimi i Presidentit nëse provohet shkelja e Kushtetutës me anulimin e datës së zgjedhjeve.
