Kryemadhi takohet me ambasadorin e ri gjerman: Zgjidhja e krizës hap rrugën për në BE

Kryetarja e LSI Monika Kryemadhi priti në takim Ambasadorin e ri të Republikës Federale të Gjermanisë, Peter Zingraf.

Në bisedën me ambasadorin e ri gjerman, ndërsa i ka uruar mirëseardhjen, Kryemadhi ka nënvizuar nevojën e vendit për të tejkaluar sa më parë krizën aktuale, për t’i hapur rrugë integrimit të vendit në BE.

Ndër të tjera, kryetarja e LSI vlerësoi kontributin e qeverisë Gjermane për hartimin e Reformës në Drejtësi, ndërsa shprehu bindjen për nevojën e zbatimit të reformës në drejtësi ashtu siç është shkruar në Kushtetutë

“Të majtë e të djathtë duan që Shqipëria të jetë pjesë e Bashkimit Europian. Integrimi në BE është i rëndësishëm për familjet shqiptare, pasi do të shtojë mundësitë për punësim të mirë paguar, do të rrisë cilësinë në arsimim dhe shëndetësi, e do të përmirësojë standardet e jetesës në Shqipëri. LSI ka objektiv të saj Integrimin e Shqipërisë në BE.”, tha Kryetarja e LSI.

“Pa sistem drejtësie të pavarur, nuk ka investime të huaja. Pa investime të huaja, nuk ka punësim. Pa mundësi punësimi, nuk ka të ardhme për rininë e cila po largohet nga vendi duke emigruar dita-ditës. Ndaj LSI kërkon që Reforma në Drejtësi të vazhdojë përpara me integritet ashtu siç është shkruar në Kushtetutë, e cila është miratuar unanimisht nga 140 përfaqësuesit e popullit në Kuvend.”, u shpreh Kryemadhi.