Detaje të tjera kanë dalë nga arrestimi i pedagogut të Universitetit të Elbasanit “Aleksandër Xhuvani”, Denis Himçi.
Pedagogu u vu në pranga mbrëmë menjëherë pas transmetimit të emisionit “sopt” në TV Klan ku dëgjohej që i kërkonte seks një studenteje në këmbim të marrjes së provimeve.
Policia e Elbasanit njofton se 36-vjeçari akuzohet për veprat penale “Ushtrimi i ndikimit të paligjshëm ndaj personave që ushtrojnë funksione publike” dhe “Korrupsioni pasiv i personave që ushtrojnë funksione publike”.
NJOFTIMI ZYRTAR I POLICISE
Specialistët për Hetimin e Krimit Ekonomik dhe Financiar në Drejtorinë Vendore të Policisë Elbasan, bënë ndalimin e shtetasit D.H., 36 vjeç, pedagog pranë Universitetit “Aleksandër Xhuvani”, Elbasan, për veprat penale “Ushtrimi i ndikimit të paligjshëm ndaj personave që ushtrojnë funksione publike” dhe “Korrupsioni pasiv i personave që ushtrojnë funksione publike”.
Ndalimi i tij u bë pas transmetimit të pamjeve filmike në emisionin investigativ “Stop “, ku ky shtetas i kërkonte favore seksuale një studenteje në këmbim të dhënies së provimeve.
Materialet i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
