Presidenti Ilir Meta sapo ka dalë nga Presidenca, duke u nisur në këmbë drejt Kryesisë së Kuvendit.
Meta do të përballet sot me Komisionin Hetimor, të ngritur nga mazhoranca për shkarkimin e tij.
Jam shumë i motivueshëm në të gjitha vendimet e mia. Do të jem president i Republikës deri në vitin 2022′, tha Meta për mediat, teksa u pyet nëse i trembej shkarkimit.
Teksa e ka bërë në këmbë distancën nga Presidenca te Kryesia e Kuvendit, Meta shoqërohet nga tre këshilltarët e tij, Bahri Shaqiri, Tedi Blushi dhe Bledi Dervishaj.
Kreu i shtetit është thirrur në Komisionin Hetimor për të dëshmuar lidhur me legjitimitetin e dekretit të tij, që anulloi zgjedhjet e 30 qershorit.
Komisioni hetimor pasi të dëgjojë Presidentin do të takohet dhe me një delegacion të komisionit të Venecias që pritet të mbërrijë në Tiranë pasditen e të hënës, por takimet i ka planifikuar t’i zhvillojë të martën dhe të mërkurën e 10 dhe 11 Shtatorit.
Nga ana tjeter kryetari i komisionit, Ulsi Manja ka deklaruar se opinioni i komisionit të Venecias do të jetë shumë i rëndësishëm për përgatitjen e raportit final që do t’i çohet seancës për miratim. Sipas tij, nëse raporti nuk do të vijë përpara afatit të parashikuar për përfundimin e punës së komisionit që është data 9 Tetor, atëherë do të kërkojnë shtyrje të mandatit të punës së tij.
