Një lajm i trishtë vjen nga bota e medias, ku mësohet se Ardita Sylejmani, gazetarja e njohur e Radio Televizionit të Kosovës ka humbur jetën gjatë lindjes së fëmijës së tretë.
Mësohet se gazetarja 33 vjecare ka pasur komplikime shëndetësore në kohën që po sillte në jetë fëmijën, ndërsa mjekët në spitalin në Budapest të Hungarisë ku ajo ndodhej e shtruar nuk kanë arritur dot ta mbajnë në jetë.
Sylejmani ishte e martuar me Shpend Bllacën, i punësuari në stafin diplomatik të Republikës së Kosovës në kryeqytetin hungarez.
Gazetarja kishte edhe 2 fëmijë të tjerë, por nuk mundi të qëndrojë në jetë kur po sillte në jetë fëmijën e tretë.
Pas lajmit të hidhur Drejtori i përgjithshëm i RTK-së, Ngadhnjim Kastrati ka publikuar një status në rrjetet sociale për largimin nga jeta të koleges së tyre:
Me pikëllim të thellë morëm lajmin për ndarjen nga jeta të koleges, gazetares së dhomës së lajmeve Ardita Sylejmani – Bllaca.
Ardita dha një kontribut të madh në RTK gjatë tërë kohës sa ka punuar në dhomën e lajmeve. Prandaj, humbja e saj është humbje e madhe për Radio Televizionin e Kosovës.
Përkushtimi në punë në secilën detyrë që iu është besuar, si dhe dashuria për profesionin, bëjnë që Ardita Sylejmani – Bllaca të mbetet në kujtesën e familjarëve, miqve dhe kolegëve.
Familja Sylejmani, familja Bllaca si dhe kolege te RTK-se dhe me gjere pranoni ngushëllimet më të sinqerta për ndarjen e saj nga jeta.
