Ditën e sotme, presidenti Ilir Meta ka dorëzuar në Kuvend dokumentin sekret që dispononte për cështjen e djegies së parlamentit në protestën e 8 qershorit, informacion ky që u bë shkak sipas presidentit që të anulonte dekretin për zgjedhjet vendore të 30 qershorit.
Mësohet se Meta e ka dërguar në Komisionin Hetimor këtë dokument por ende nuk i është paraqitur anëtarëve të tij.
Kreu i Komisionit Hetimor Ulsi Manja ka deklaruar se disa anëtarë nuk kanë certifikatë sigurie dhe për këtë arsye nuk janë njohur me dokumentin.
Ndërkohë ditën e sotme, me 7 vota pro dhe me dy kundër, komisioni miratoi kërkesën për zgjatjen e punimeve për shkarkimin e presidentit Ilir Meta.
Kjo kërkesë për të shtyrë me dy muaj punimet e komisionit erdhi për shkak se konkluzionet e komisionit të Venecias do të dalin më 12 tetor, disa ditë pas mbylljes së afatit ligjor të strukturës hetimore që është data 8 tetor.
