Dëmet e rënda nga tërmeti, evakuohen banorët e këtij pallati në Tiranë

Banorët e katit të fundit të një pallati pranë rrugës Myslym Shyri në Tiranë, do të evakuohen, pasi dëmtimet e shkaktuara nga tërmeti kategorizohen, si një nga rastet emergjente.

Bëhet fjalë për një godinë te ndërtuar në vitet ‘60 ku lëkundjet e kanë bërë katin e fundit të tij, të rrezikshëm për të banuar. Grupet e inspektimit kanë mbërritur për të verifikuar situatën, çka detyron zhvendosjen e banorëve raporton Vizion Plus.

Janë 8 persona që banojnë në katin e fundit që sipas përfaqësuesve të pushtetit lokal, do të strehohen në qendrat e bashkisë, deri në riprojektimin dhe rikonstruksionin e godinës.

E zonja e shtëpisë Donika Kashari tregon momentet e panikut gjatë lëkundjeve, moment i cili do të mbetet gjatë në kujtesën e saj.

Sipas të dhënave raste të tilla ka në disa zona të Tiranës, ku si pasojë e amortizimit të godinave të vjetra, lëkundjet kanë shkaktuar dëme shqetësuese.