LIGJET E BIZNESIT
Agustin Kola përsërit se finalja e Kupës së Shqipërisë mes Tiranës dhe Flamurtarit në vitin 2009 ka qenë e toleruar në favor të vlonjateve me ndërhyrjen e politikës. Pas reagimit të Shpëtim Gjikës, ish-kryebashkiak i Vlorës e njëkohësisht në ato vite president i Flamurtarit, legjenda bardheblu ka përsëritur për Vip Sport se këto deklarata nuk prishnin marrëdhënien që kishin të dy.
Ai ka nxitur ish-presidentin Bamir Topi të reagojë, duke theksuar se me Gjikën kishte një miqësi të madhe, ashtu si vlerësimin e dashurinë që kishte për Flamurtarin e popullin e Vlorës.
“Ajo që unë thashë nuk ka lidhje me shitje ndeshjesh për lekë dhe këtë e përsëris. E gjitha kjo u bë sepse ndërhyri politika dhe në momentin që politika ndërhyn, nuk mund të flitet më për sport. Me Gjikën unë nuk kam asgjë personale, sepse është një mik shumë i mirë dhe sa e dua Gjikën e sa më do ai mua, nuk besoj se duhet kush tjetër.
Unë e njoh shumë mirë Gjikën dhe e di shumë mirë që është burrë zotëri dhe prandaj e bëri edhe atë reagim. Po të ishte burrë, do të reagonte Bamiri por të gjithë e dimë kush, si dhe çfarë është politika në Shqipëri.
Gjika ka bërë shumë dhe sa të mira ka bërë ai për Flamurtarin… ndërsa këta tjerët po i shkatërrojnë. S’besoj se e do kush Flamurtarin dhe Tiranën aq sa i dua unë, por i dua tamam ndërsa këta mendojnë t’i shkatërrojnë. Mua më kanë dashur dhe i dua të gjithë ata që kanë bërë për Flamurtarin, që nga Vasil Ruci e Sokol Kushta e tifozeria. Ata janë shpirti i vërtetë i Flamurtarit dhe me ta kam qenë miq në fushë e jashtë saj.
Unë jam i drejtpërdrejtë, thashë fiton Kukësi, fitoi. Thashë fiton Partizani, fitoi. Jo se e parashikova, por sepse kështu do politika.
Përsëri dua të sqaroj çështjen me Gjikën. Unë nuk kam asgjë me të, e dua shume dhe e di se çfarë njeriu është. Ne kemi qenë gjithmonë të persekutuar më herët, “jo maloku”, “jo çami””, ishin fjalët e Kolës për deklaratat e tij për shitjen e finales së Kupës së Shqipërisë dhe reagimin e ish-kryebashkiakut të Vlorës, Shpëtim Gjika.
Vip Sport
