613 kg kokainë/ Ekstradohet nga Gjermania Arbër Çekaj, mbërrin në Rinas nën masa të rrepta sigurie (FOTO)

Ka mbërritur në Rinas ditën e sotme në masa të rrepta sigurie Arbër Çekaj, pronari i kompanisë “Arbri Garden”, ku u gjetën 613 kile kokainë në Maminas.

Dhjetëra agjentë dhe 5 furgona policie ishin në Rinas, ku një avion nga Gjermania solli në Shqipëri Arbër Çekajn.

Mësohet se Arbër Çekaj do të qëndrojë në qelitë e burgut 313 në Tiranë dhe brenda 3 ditëve do të dalë para Gjykatës së Krimeve të Rënda, ku do njihet me masën e sigurisë “Arrest me burg”, që është dhënë ndaj tij në mungesë.

Arbër Çekaj u largua nga Shqipëria drejt Gjermanisë, pak ditë para se të zbulohej kontenieri me banane në Maminas, ku brenda tij ishin fshehur 613 kg kokainë.

Çekaj fillimisht u mbajt nga autoritetet gjermane, por më pas gjykata vendosi ekstradimin drejt Shqipërisë.