Policia e Fierit ka arrestuar mëngjesin e sotëm dy autorët e vrasjes së 23-vjeçarit Florian Selimi në fshatin Hamil të Fierit.
Sipas uniformave blu janë arrestuar shtetasit me iniciale S.S, 26 vjeç dhe K.M 20 vjeç, banues në fshatin Sulaj.
Kujtojmë se orët e para të mëngjesit të djeshëm këta dy persona për motive të dobëta, vranë me thikë dhe e hodhën të riun Selimi në kanal.
Në kohën që viktima u gjet në kanal, pranë trupit ishte dhe makina e tij me gomë të hequr dhe kofano të hapur.
NJOFTIMI ZYRTAR I POLICISË
Policia e Fierit zbardh dhe dokumenton vrasjen e 23 vjeçarit në fshatin Hamil.
Arrestohen 2 autorët e dyshuar.
Specialistët për Hetimin e Krimeve të Rënda në Drejtorinë Vendore të Policisë Fier, pas një pune të mirëfilltë hetimore, zbardhën dhe dokumentuan ngjarjen e ndodhur gjatë natës së datës 11.08.2019 në fshatin Hamil ku u gjet i vrarë me thikë 23 vjeçari F.S.
Në përfundim të hetimeve u arrestuan shtetasit:
S.S, 26 vjeç, banues në fshatin Sulaj.
K.M, 20 vjeç, banues në fshatin Sulaj.
Gjatë natës së datës 11.08.2019, në fshatin Hamil, këta shtetas në bashkëpunim me njëri tjetrin, për motive të dobëta, kanë vrarë me mjet prerës shtetasin F.S, 23 vjeç, i cili ka ndërruar jetë.
Materialet i kaluan Prokurorisë pranë Gjykatës së Shkallës së Parë Fier për veprat penale “Vrasje me dashje” e kryer në bashkëpunim dhe “Prodhimi dhe mbajtja pa leje e armëve të ftohta”.
