Rrugëtimi politik, nga Shpëtim doganieri në Idriz çami patriot…

Sot ai është shndërruar në personazh kryesor të politikës, duke i dhënë tonin asaj nën emrin e kauzës çame, por rrugëtimi politik e tregon jo dhe aq idealist, jo dhe aq koherent si çam i lindur. Ky është Shpëtim Idrizi, njeriu që gjithashtu po koston edhe në marrëdhëniet mes dy vendeve me protagonizmin  e tij politik. Gjithnjë si “çam i lindur”.

Por siç u cek dhe pak më lart, ai nuk ishte i tillë kur u fut në të, por u bë gjatë rrugës.

Shpëtim Idrizi do ishte në fillimet e tij politike një teknokrat, i zgjedhur nga Nano për të drejtuar doganat shqiptare aty nga viti 2003.

Deri në atë kohë, emri i tij nuk ishte dhe aq i njohur, qoftë edhe si ekonomist apo financier, e aq më pak si eksponent politik tek e majta. Sa për çam, në kontekstin politik, as që njihej fare. Ai do përfshihej dalëngadalë në strukturat e PS-së, por kurrë si çam apo në emër të kauzës çame.

Pikëtakimi i tij me kauzën një fjalë do të ndodhte pas zgjedhjeve të vitit 2009. Idrizi fiton një mandat deputeti, por partia e tij, PS-ja, mbeti në opozitë. Kështu, ai nis e zhvendoset dalëngadalë tek kuaza që për momentin menaxhohej nga Tahir Muhedini, ku pas disa fërkimeve arrijnë të bien në kompromis për të qenë të dy në një front.

Partia për Drejtësi, Integrim dhe Unitet, PDIU merret në dorëzim nga Shpëtim Idrizi, i cili me mandat të PS-së kalon si deputet i saj në parlament, ama butë e butë, pa bërë fjalë me Ramën, të cilit, siç e tregoi dhe koha, ia mbajti syrin shkelur edhe gjatë aleancës me Berishën në vitet 2009-2013, duke qëndruar si veshka mes dy masave të dhjamit në qeveri, PD-së dhe LSI-së, me jo pak drejtori e poste administrative të marra, ku veçohej ajo e Transportit Rrugor, ndryshe  “Patentat”, që binin era lekë më thasë.

Madje media pranë opozitës në atë kohë, si Tema e Mero Bazes, talleshin me faktin se si kauza çame mund të merrte udhë zgjidhjeje nëpërmjet patentave!

Kohët ndryshuan dhe në pushtet erdhi PS-ja. Por kauza e Idrizit mbeti po ajo. Si “çam i lindur” për ta nxjerrë “qimen nga qulli” në çdo situatë, sado e vogël qimja e sado masë e madhe qulli, ai qëndroi fillimisht në opozitë, derisa ashtu si pa u ndjerë nisi të afrohej me ish-kryetarin e tij Rama, e sot janë sërish krahpërkrah njëri-tjetrit në aleancë.

Idrizi po shfaqet tashmë si një rival i Metës për ta mbajtur ai me “gjakun çam” të majtën në pushtet dhe kjo është mëse e natyrshme. Nëse ka një forcë politike apo një personazh politik që mund ta rivalizojë LSI-në apo Metën në frymë e profil politik – pavarësisht kauzave të integrimit apo çemërve të tragjedizuar – kjo është PDIU dhe Shpëtim Idrizi. /teshesh.com/