Klubi italian i Romës ka ndërmarrë një nismë shumë të veçantë për fëmijët e humbur.
Në mesin e lajmeve të merkatos, bashkangjitur postimit të zyrtarizimit të blerjes së mbrojtësit të krahut të djathtë, Zapakosta janë publikuar edhe fëmijët që rezultojnë të humbur në të gjithë botë. Mes tyre figuronte edhe vajza shqiptare Bleona Mata e humbur prej mëse 9 vitesh.
Fotoja ku është realizuar identikiti se si ajo duket në moshën 16-vjeçare është postuar përkrahë mbrojtësit Zapakosta.
“Këtë verë Roma mbështet nismën për të gjetur fëmijët e humbur në të gjithë botën”, shkruhet në postimin e klubit italian për zyrtarizimin e mbrojtësit që vjen nga Çelsi.
Bashkangjitur fotos ata kanë publikuar edhe numrin e celularit të zyrës në Romë, ku mund të kontaktojë çdo qytetarë që ka informacion.
Bleona Mata është zhdukur prej 9 vitesh në mënyrë misterioze dhe nëna e saj nuk ka reshtur së kërkuari në shumë programe televizive në vendin tonë.
