Rama u distancua nga Pjetri, PD: Nuk ia hedh dot siç bëre me Roshin dhe Frrokun

Ka ardhur edhe përgjigja nga Partia Demokratike në lidhje me vendimin e kryeministrit Edi Rama, i cili u distancua nga çështja e Valdrin Pjetrit.

Rama shkruajti se Pjetri deri në momentin që do të zgjidhë këtë punë me drejtësinë nuk ka më punë me PS dhe ky fat i pret të gjithë nëse bëjnë atë që ka bërë. Por kjo lëvizje nga Rama nuk është përtypur nga PD, që shfaq mosbesim nëpërmjet Gazmet Bardhit.

Sipas Bardhit, kryeministri Rama është damkosur dhe njihet tashmë nga qytetarët si personi që promovoi krimin në institucionet publike si në parlament, qeveri dhe bashki.

Postimi i Bardhit:

Heshti për 11 ditë dhe tani po përsërit filmin që kemi parë me Elvis Roshin, me Arben Ndokën, me Mark Frrokun, me Armando Prengën, me Artur Bushin, me shume edirama kriminelë të veshur me pushtet. Valdrin Pjetrin e emëroi Edi Rama, nuk u bë vetë as drejtor hipoteke, as prefekt, as kandidat për Kryetar Bashkie. Lojës me larje duarsh i ka ardhur fundi! Edi Rama është damkosur si kryeministri që promovoi krimin në parlament, qeveri dhe bashki.