Rakip Suli e nis me “sëpatë të madhe” ndaj Xhelal Maziut, ja përse e ka paditur në gjykatë

Ende pa ngrohur mirë karrigen e kryetarit të Bashkisë së Kamzë, Rakip Suli ka vendosur të padisë paraardhësin e tij Xhelal Mziun dhe ish-zyrtarë të kësaj bashkie për dhënien e paligjshme të një leje ndërtimi brenda Parkut Kombëtar të Paskuqanit.

Suli denoncoi shkeljet ligjore të bëra nga ish-kryebashkiaku Mziu duke argumentuar se nuk mund të ndërtohet në një terren që ka statusin e ‘’Parkut Kombëtar’’.

‘’Kamza tani ka një mori problemesh, por do ti rendisim sipas problematikave dhe nga ato më emergjentet. Ish-kryebashkiaku ka dhënë një leje ndërtimi me datë 29.07.2019. Në bazë të një vendimi të nxjerrë në vitin 2013, e gjithë kjo pjesë është planifikuar për Park Kombëtar. Është menduar që kjo zonë të ishte një Park Kombëtar.

Dhe mendohet se edhe bulevardi kryesor i Tiranës do të vijë këtu ku jemi. Është dhënë kjo leje ndërtimi, brenda këtij territori duke shkelur të gjitha ligjet. Ky është është një vendim kriminal i miratuar me datë 29.07. 2019. Qyetarëve nuk u bëhet legalizimi dhe nga ana tjetër këto japim leje. Madje kjo është një pjesë me ujë. Jemi duke dhënë leje ndërtimi në shtratin e liqenit.

Brenda muajit është marrë leja e ndërtimit. Këtu mendohet do të bëhet një park për të gjithë qytetarët e Kamzës. Do të ngrihet padi për këtë çështje dhe për të gjithë personat përgjegjës’’, u shpreh kryebashkiaku i Kamzës.