Po konfliktohej me të birin, arrestohet 66-vjeçari me municione luftarake në banesë

Policia e Korçës ka vënë në pranga një 66-vjeçar, i cili mbante në banesë pa leje armë zjarri, pajisje shpërthyese dhe municione luftarake.

Uniformat blu bëjnë me dije se pas arrestimit të tij është bërë i mundur parandalimi i përshkallëzimit të një konflikti në familje.

Kanë qenë banorët ata të cilët kanë njoftuar policinë se në fshatin Drenovë kishte konflikt në një familje, dhe se i zoti i banesës posedonte armë zjarri.

Pasi ka shkuar policia, 66-vjeçari është vënë në pranga, gjatë momentit që ishte duke u konfliktuar me djalin e tij.

NJOFTIMI ZYRTAR I POLICISE

Shërbimet e Komisariatit të Policisë Korçë, pas marrjes së njoftimit se në fshatin Drenovë kishte konflikt në një familje, dhe se i zoti i banesës posedonte armë zjarri, kanë shkuar menjëherë në adresën e dhënë dhe falë veprimeve të shpejta parandaluan përshkallëzimin e konflikit që mund të sillte pasoja të rënda për jetën.

Policia ka arrestuar në flagrancë shtetasin P.Th., 66 vjeç, i cili po konfliktohej me djalin e tij.

Gjatë kontrollit në banesën e këtij shtetasi, Policia gjeti dhe sekuestroi në cilësinë e provës materiale një armë zjarri pushkë, municione luftarake, si edhe pajisje shpërthyese.

Materialet në ngarkim të tij, i kaluan Prokurorisë së Rrethit Gjyqësor Korçë, për veprat penale “Dhuna në familje” dhe “Prodhimi dhe mbajtja pa leje e armëve luftarake dhe e municionit”.