PD njofton konferencën e jashtëzakonshme, paralajmëron informacionin ‘bombë’ që do trondisë mazhorancën

Ditën e sotme Partia Demokratike pritet të publikojë informacione me rëndësi që do të ‘fundosin” një tjetër kryebashkiak të mazhorancës në pushtet.

Pas Valdrin Pjetrit, i cili dha dorëheqjen menjëherë pas publikimit të dokumentave të dënimit në shtetin Italian, sot burime nga PD bëjnë me dije se rradhën e ka Agim Kajmaku, kryetari i Bashkisë së Vorës zgjedhur pas votimeve të 30 qershorit.

Selia blu ka njoftuar një konferencë të rëndësishme për mediat në orën 12:00, ditën e sotme.

Mësohet se do të jetë Sekretari i Përgjithshëm i PD-së, Gazment Bardhi i cili do të publikojë dokumentet që sipas demokratëve implikojnë Agim Kajmakun në veprimtari kriminale.

Një paralajmërim të tillë e bëri dhe Zëri i Amerikës, ku është theksuar se për Agim Kajmakun ka një dosje të hapur penale më drejtësinë greke.

Sipas letrës që çoi në Prokurori, PD këmbëngul që Agim Kajmaku është arrestuar në Greqi me emrin Jorgo Toto, por ai e ka fshehur këtë fakt në formularin e dekriminalizimit, prandaj duhet te largohet nga detyra.